Aus: Bernhard Reil: " Jesasnaa - etz kummst u aa!"

Do schaust alt aus

 

Im Untaricht in Biologie

hot der Rektor vo der Schoul

in der Zweitn zouhäirn wolln

und setzt si hintn af aan Stouhl.

 

Vom Werden und Vergehen,

vo Jung und Alt woar do de Red,

vo Pflanzn, Tiern und vo Menschn

und wäi de Zeit vergäiht.

 

Om End der Stund sacht der Herr Rektor,

de Kinner solln´s amol probiern

und der Lehrerin ihr Alter schätzn.

Es Fritzla will´s aa glei riskiern.

 

Kritisch schaut der Klaa zum Freilein,

kaut weng af seim Bleistift rum;

maant, su um de Fümfasiebzich?

Den Rektor haut´s vur Schreck glei um.

 

De Lehrerin is gscheit erschroggn.

De Schätzung schlächt ihr af´n Moong.

Sie is zwor aa scho üba Fuffzig,

doch Fümfasiebzich - sin übazong.

 

Der Bou hot glei gmerkt: Des woar falsch,

und redt si ganz schnell raus:

"Na - naa, su alt bist sicher net,

du schaust blouß su alt aus."